به‌پێی هه‌واڵی گه‌یشتوو به‌ تۆری مافه‌كانی مرۆڤی كوردستان، ڕۆژی ڕابردوو ١٣ی پووشپه‌ڕ، هێزه‌ ئه‌منیه‌تییه‌كان له ‌شاری نه‌غه‌ده‌ هاووڵاتییه‌كی كوردیان به ‌ناوی “ئومید موسته‌فاپوور” ده‌ستبەسه‌ر کرد و ڕه‌وانه‌ی شوێنێكی نادیاریان كردووە. هێزه‌ ئه‌منیه‌تییه‌كان وێڕای پشكنینی ماڵی ناوبراو، هەندێ لە کەرەستە و کەلوپەلە شه‌خسییەکانیشیان له‌گه‌ڵ خۆیان بردووه‌.
هێزه‌ ئه‌منیه‌تییه‌كان هیچ هۆکارێكیان وەک هۆکاری ده‌ستبه‌سه‌ركردنی ناوبراو دەستنیشن نەکردووە.
به‌پێی ئه‌و ئامارانه‌ی له ‌لایه‌ن تۆڕی مافه‌كانی مرۆڤی كوردستانه‌وه‌ كۆ كراونه‌ته‌وه،‌ له‌ یه‌كه‌م ڕۆژی مانگی پووشپه‌ڕه‌وه‌ تا هه‌نووكه‌، لانیكه‌م ١٣ چالاك و هاووڵاتیی كورد له‌ شاره‌كانی سنه‌، مه‌هاباد، مه‌ریوان و ئیسلامئاوای ڕۆژئاوا، له‌ لایه‌ن هێزه‌ ئه‌منیه‌تییه‌كانه‌وه‌ ده‌ستبه‌سه‌ر كراون. له‌ ناو ئه‌م كه‌سانه‌دا ته‌نیا “كاوان كه‌سرایی” به‌ دانانی بارمته‌ ئازاد کراوه‌ و هیچ زانیارییەک له‌سه‌ر چاره‌نووسی ئه‌و ١٢ ده‌ستبه‌سه‌ركراوه‌كه‌ی‌تر له ‌به‌رده‌ستدا نییه‌.